ශ්රී ලංකාවේ සමස්ත ඩිජිටල් පරිවර්තන ගමන වේගවත් කිරීම පිළිබඳ විශේෂ සාකච්ඡාවක් එක්සත් ජාතීන්ගේ සහකාර මහලේකම් සහ ආසියා පැසිෆික් කලාපීය අධ්යක්ෂිකා කන්නි විග්නරාජා මහත්මිය, එක්සත් ජාතීන්ගේ සංවර්ධන වැඩසටහනේ ශ්රී ලංකාවේ නේවාසික නියෝජිත අසූසා කුබෝටා මහත්මිය ඇතුළු නියෝජිත පිරිසක් සහ ශ්රී ලංකා රජයේ නිලධාරීන් අතර පසුගියදා පැවැත්විණි. මෙම හමුව සඳහා ගරු, ඩිජිටල් ආර්ථික නියෝජ්ය අමාත්ය එරංග වීරරත්න, ඩිජිටල් ආර්ථිකය පිළිබඳ ජනාධිපති ජ්යෙෂ්ඨ උපදේශක ආචාර්ය හාන්ස් විජයසූරිය සහ ඩිජිටල් ආර්ථික අමාත්යාංශයේ ලේකම් වරුණ ශ්රී ධනපාල යන මහත්වරුන් එක්වූහ.
මෙහිදී රටේ ඩිජිටල් යටිතල පහසුකම් නැංවීම සම්බන්ධයෙන් දීර්ඝ ලෙස කරුණු සාකච්ඡා වූ අතර, විශේෂයෙන්ම ඩිජිටල් පොදු යටිතල පහසුකම් (Digital Public Infrastructure - DPI) සංවර්ධනය කිරීම සහ ජාත්යන්තර මූල්ය ආයතන (IFI) මගින් අරමුදල් සම්පාදනය වන වැඩසටහන් හරහා උදාවන නව ආයෝජන අවස්ථා පිළිබඳව ප්රමුඛ අවධානයක් යොමු කෙරිණි. එමෙන්ම UNDP සහ ලෝක සෞඛ්ය සංවිධානය (WHO Sri Lanka) එක්ව ක්රියාත්මක කරනු ලබන 'OneRegistry' ව්යාපෘතියේ වත්මන් ප්රගතිය පිළිබඳවද මෙහිදී පුළුල් ලෙස විමසා බලන ලදී.
ශ්රී ලංකාවේ තිරසාර සංවර්ධනය උදෙසා ඩිජිටල් තාක්ෂණය භාවිත කිරීමේදී එක්සත් ජාතීන්ගේ ප්රධානතම මෙහෙයුම් ආයතනය ලෙස UNDP හි පූර්ණ සහයෝගය අඛණ්ඩව ලබාදෙන බව කන්නි විග්නරාජා මහත්මිය මෙහිදී යළි තහවුරු කළාය. පවතින ඩිජිටල් වැඩසටහන් තවදුරටත් බලගන්වමින්, එක්සත් ජාතීන්ගේ ඩිජිටල් පරිවර්තන රාමුව යටතේ ශ්රී ලංකාවේ ඩිජිටල් අනාගතය ශක්තිමත් කිරීමට කැපවෙන බවද ඇය වැඩිදුරටත් සඳහන් කළාය.
